ថៃ៖ រដ្ឋមន្រ្តីក្រសួងសុខាភិបាលថៃ នៅថ្ងៃចន្ទ ទី០៩ ខែមករានេះ បានប្រកាសពីគោលការណ៍សម្រាប់អ្នកដំណើរបរទេសមកកាន់ប្រទេសរបស់ខ្លួន ដោយមិនទាមទារឱ្យមានការបង្ហាញភស្តុតាងពាក់ព័ន្ធនឹងការចាក់វ៉ាក់សាំងកូវីដ-១៩ គ្រប់គ្រាន់ជាមុនឡើយ ដោយអះអាងថាមិនមានអ្វីជាធំដុំឡើយ ផ្អែកតាមកម្រិតនៃភាពស៊ាំនៃបណ្តាប្រទេសនានា រួមទាំងប្រទេសចិនផង។

លោក អានុទីន វិច្ឆរ៉ាគុល (Anutin Charnvirakul) រដ្ឋមន្រ្តីសុខាភិបាលថៃនិយាយថា តម្រូវការដែលទាមទារឱ្យអ្នកដំណើរ និងអ្នកទេសចរឱ្យបង្ហាញភស្តុតាងពាក់ព័ន្ធនឹងការចាក់វ៉ាក់សាំងមុននឹងអនុញ្ញាតឱ្យចូលមកកាន់ប្រទេស វាជារឿងមួយដែលមិនចាំបាច់ ស៊ាំញ៉ាំ និងបង្កការលំបាកសម្រាប់ភ្ញៀវទេសចរ។ ការលើកឡើងបែបនេះ ដោយលោកផ្អែកលើទិន្នន័យដែលបង្ហាញដោយអ្នកជំនាញបានបញ្ជាក់ថា បច្ចុប្បន្ននេះចំនួនវ៉ាក់សាំងកូវីដ-១៩ ពុំមានការខ្វះខាតឡើយ ដោយការផ្គត់ផ្គង់វ៉ាក់សាំងមានគ្រប់គ្រាន់ទូទាំងសកលលោក។

មិនត្រឹមតែប៉ុណ្ណោះ លោក អានុទីន ថែមទាំងលើកទឹកចិត្តកុំឱ្យមានភាពតឹងរ៉ឹងខ្លាំងជាមួយអ្នកដំណើរដែលពុំបានចាក់វ៉ាក់សាំងគ្រប់គ្រាន់ផងដែរ។

គួរឱ្យដឹងថា ជើងហោះហើរដំបូងពីចិនមកកាន់ប្រទេសថៃ បានមកដល់កាលពីថ្ងៃទី០៩ ខែមករា ឆ្នាំ២០២៣នេះ ដោយគេរំពឹងថាថ្ងៃដំបូងនឹងមានភ្ញៀវមកពីចិនប្រមាណ ៣,៤៦៥នាក់។ ដោយថៃចាប់ផ្តើមបើកប្រទេសឡើងវិញ ជាបណ្តើរៗគេសង្កេតឃើញចំនួនអ្នកទេសចរមានការកើនឡើងជាបន្តបន្ទាប់ ជាក់ស្តែងកាលពីខែវិច្ឆិកា ឆ្នាំ២០២២ មានភ្ញៀវទេសចរសរុបចំនួនជាង ១,៧លាននាក់បានមកកាន់ប្រទេសថៃ។

ជាមួយតួលេខនេះ លោក Anutin Charnvirakul រំពឹងថា ចំនួនភ្ញៀវបរទេសចិននឹងមានចំនួនប្រមាណ ៧លាន ទៅ ១០លាននាក់ លើសពីការរំពឹងទុកដំបូងមានប្រមាណ ៥លាននាក់ប៉ុណ្ណោះ៕